| A vida e a obra de Rosalía de Castro están presentes, desde hai case medio século, nos traballos e nos días de Xesús Alonso Montero: no profesor, no conferenciante, no investigador, no comentarista, no divulgador, no editor de textos, no antólogo… Na presente colectánea hai páxinas que ilustran moi ben este compromiso intelectual, compromiso que, ás veces, ten un certo matiz de militancia."Páxinas sobre Rosalía de Castro (1957-2004)" é un corpus de traballos que se centran na recepción do nome e da obra de Rosalía desde 1875 (Lamas Carvajal) a hoxe mesmo. Protagonizan os catorce capitulos do volume, editores, apoloxistas, tradutores… pero tamén os silencios e as reticencias que tales ou cales textos de Rosalía teñen suscitado, especialmente nun ano bélico, o 1937, centenario da escritora. É un longo e variado corpus de xuízos, enfoques e actitudes: Emilia Pardo Bazán, Valle-Inclán, Valera, Curros, José Martí, Azorín, Juan Ramón, Luis Cernuda, Griswold Morley, A.M. Morris, Dantín Cereceda, Celestino Fernández de la Vega, Novoneyra, Rafael Lapesa…, a colectánea tamén acolle pronunciamentos críticos do propio Alonso Montero sobre aspectos tan importantes como "a demisión (literaria) de Rosalía en 1881" ou o seu punto de vista sobre o opresor foráneo nalgúns poemas da escritora. A colectánea é rica en textos inéditos, cartas sobre todo, que ilustran algúns dos capítulos (Dámaso Alonso, Rof Carballo…). Capítulos hai que conteñen en apéndice textos sobre Rosalía case descoñecidos. |
